Asistencia libre o día da visita, ou ben podes reservar previamente no email: loxistica@redeacampa.org indicando: nome completo e teléfono.
Grazas.
XOGO DE PATRIOTAS
(Polonia, 2017)
“O más urxente en Polonia é reconstruír a identidade nacional. Afastámonos moito da relixión e do patriotismo. Cómpre volvermos ás raíces cristiás e desenvolvermos un comportamento máis comunitario. Occidente non pode impoñernos os seus valores.”
Szymon, segundo ano do programa militar
Nos últimos anos, as escolas públicas polacas desenvolveron “Clases de perfil militar”, un programa educativo no marco da materia “Educación para a seguridade”. O programa, considerado como unha “innovación pedagóxica”, está destinado a adolescentes de entre 16 e 19 anos. As actividades prácticas lévanse a cabo en colaboración con organizacións privadas paramilitares ou co exército polaco. O seu obxectivo é desenvolver habilidades militares entre a mocidade, pero moitos mestres e paramilitares apuntan a fortalecer a conciencia patriótica e relixiosa, tomando “Deus, Honor e Patria” como lema.
A maioría de adolescentes con que falei inscríbense neste programa porque senten preocupación polo seu futuro. Consideran o Exército, a Policía ou outros servizos públicos uniformados como o empregador máis seguro e esperan que estas clases lles axuden a conseguir un traballo. Outros consideran o curso unha aventura interesante ou séntense fascinados polo fasto militar. Que pensan cando rematan o programa?
Fixen a mesma pregunta na primeira e terceira clase (a derradeira) do programa: “Se puideses construír Polonia desde o principio, que sería o máis importante para ti?” Mentres que a maioría de estudantes de primeiro ano responderon “crear novos empregos”, a maioría dos de terceiro ano contestaron “reconstruír a identidade nacional”.
A XUNGLA
((Refuxiados non desexados no bosque de Białowieża), Polonia 2022/2023
Durante o ano pasado, Polonia acolleu 1,5 millóns de refuxiadas e refuxiados ucraínos e brindoulles a asistencia necesaria, incluídos permisos de traballo e residencia. Porén, a poucos quilómetros ao norte da fronteira con Belarús, as persoas refuxiadas, principalmente de Oriente Medio e África, enfróntanse a políticas extremadamente duras contra a inmigración.
Desde novembro de 2021, miles destas persoas refuxiadas tentan cruzar o bosque de Białowieża. Denominado por algúns refuxiados “A Xungla”, este é o derradeiro bosque primitivo que queda en Europa; un lugar perigoso e difícil de atravesar, especialmente para aqueles que non están familiarizados co duro clima do nordeste de Europa. Moitos refuxiados quedan atrapados durante longos períodos; alí enfróntanse a condicións extremas, falta de alimentos e auga e, no inverno, a un alto risco de morte por hipotermia. Se os gardas fronteirizos os atrapan, polo xeral son “devoltos á fronteira”, o que a miúdo implica retornalos ao lado belaruso pola noite, sen testemuñas e cos seus teléfonos destruídos.
O Goberno polaco criminaliza a axuda humanitaria nesta fronteira, etiquetando a quen a brinda como “idiotas e traidores”. A asistencia aos refuxiados faise de forma informal e as grandes organizacións humanitarias brillan pola súa ausencia.
A produción deste proxecto conta co apoio dunha subvención do fondo IJ4EU do Instituto Internacional de Prensa (IPI) e o Centro Europeo de Xornalismo (EJC).
Comentarios Recentes