Se hai unha palabra ben definidora do sistema económico que rexe o noso modo de vida esa é espolio. O espolio é o causante de que millóns de persoas se vexan  obrigadas a saír do seu fogar para sobrevivir.

Os éxodos forzados da humanidade teñen a súa orixe no espolio incontrolado dos recursos. Desde o século XV coas viaxes de conquista, pasando polo expansionismo colonial das potencias europeas no século XIX, ata as guerras actuais, só hai unha razón, o afán capitalista de apropiarse dos recursos doutros pobos para beneficio duns poucos. Baixo fantásticos eufemismos como “Guerra Santa” ou “Liberdade Duradeira” espolian e matan sen conciencia nin escrúpulo ningún; sucede arestora en África, Siria, Iraq, Afganistán, O Brasil, O Iemen, América Latina, en Galicia e un longo etcétera.

A máis moderna forma de espolio chega da man da tecnoloxía. O espolio dos nosos datos, do noso pensamento, desexos, gustos, sensacións, contactos, fotos, opinións… todo, a nosa vida enteira, o obxectivo é o control total. Os metadatos son o novo petróleo. A tecnoloxía é, sen dúbida, un grande avance para a humanidade, sempre que se someta a controis democráticos. O problema, o que cómpre cambiar, é un sistema que xa está por encima de gobernos incapaces de implantar regras democráticas.

Por último, o espolio definitivo é o do propio planeta, que camiña de forma irreversible cara ao colapso climático pola cobiza desenfreada do sistema capitalista, condenando a millóns de persoas ao sufrimento, ao desprazamento forzado e, en moitos casos, á morte. Talvez esta pandemia mundial da COVID -19 sexa o aviso máis recente de que debemos rectificar.

Segundo datos da ONU, os recursos naturais causaron máis do 40 % das guerras nos últimos sesenta anos.

Só a conciencia e a determinación da cidadanía será capaz de forzar o cambio necesario. Por esta razón, as organizacións e persoas que conformamos a Rede Acampa pola Paz e o Dereito a Refuxio queremos mostrar nesta exposición algúns exemplos de como o espolio causa pobreza, desesperación e impotencia. A terra, o petróleo, a madeira, o
coltán, o xade, os fosfatos, son algúns exemplos para ilustrar que detrás dun desprazamento forzoso hai, normalmente, un espolio que o causa e
por iso defendemos o Dereito a Refuxio por Espolio.

Acampa 2020